Түбән Кама Җәмигъ мәчетендә «Намаз – бәхет ачкычы» проектының яңа сезоны башланды
Скопировать ссылку
Түбән Кама мөхтәсибәте Җәмигъ мәчетендә «Намаз – бәхет ачкычы» проектының 14нче сезоны башланды. Экспресс-курс 5 дәрестән тора. Бу вакыт дәвамында катнашучылар ислам нигезләре белән танышачак һәм намаз укырга өйрәнәчәк, дип хәбәр итә Татарстан мөселманнары Диния нәзарәте.
Быел формат тагын да уңайлырак: элек дәресләр якшәмбе көнне генә уздырылса, хәзер курс шимбә көннәрендә дә «Нур» мәчетендә уза.
Укуга инде 30дан артык ир-ат һәм 70тән артык хатын-кыз кушылган. Дәресләр заманча мультимедиа чаралары ярдәмендә рус һәм татар телләрендә алып барыла.
Сезон курста катнашучы ханымнар өчен яулык бәйләү буенча мастер-класс белән тәмамланачак.