Түбән Кабан күлендә оештырылачак «СапКультура» фестивалендә 600 кеше катнашуы көтелә
21 августта 16:00 сәгатьтә Түбән Кабан күлендә, Ишкәкле спорт төрләре мәктәбенең пирсында «СапКультура» су спорт төрләре фестивале башлана. Өченче ел рәттән оештырылучы бу чара быел иң күләмле тамашаларның берсенә әйләнәчәк. Катнашучылар өчен төрле форматтагы узышлар әзерләнгән, ә кич белән концерт программасы һәм ачык һавада фильмнар күрсәтү каралган. Бу хакта бүген аппарат киңәшмәсендә Вахитов һәм Идел буе районнары администрациясе башлыгы Альберт Салихов хәбәр итте, дип яза Казан мэриясе матбугат хезмәте.
Фестивальне Казанның Вахитов һәм Идел буе районнары администрациясе «Иске шәһәр» префектурасы, Парклар һәм скверлар дирекциясе, шулай ук Татарстанның Серфинг федерациясе белән берлектә оештыра. Бер ел элек чарада 400 кеше катнашкан булса, быел ким дигәндә 600 катнашучы көтелә.
Оештыручылар су өстендә ишүләрнең берничә форматын әзерләгән: 5 һәм 15 чакрымга спорт чаралары, шулай ук 200 һәм 400 метрлы спринт узышлары булачак. Моннан тыш, гаиләләр өчен дә аерым су өстендә ишү аралары каралган. Программаның иң кызыклы һәм сихри өлеше – төрле костюмнар киеп узышу. Анда татар әкиятләре каһарманнарын, заманча фильм геройларын һәм башка үзенчәлекле образларны күрергә мөмкин булачак.
«Кич белән яктылык парады планлаштырылган: катнашучыларның саплары һәм костюмнары утлар белән бизәләчәк. Кабан күле бөтенләй башкача җанланачак һәм серле яктылык дөньясына әйләнәчәк», – дип билгеләп үтте Альберт Салихов.
Шулай ук Ишкәкле спорт төрләре буенча олимпия резервы мәктәбендә тәрбияләнүчеләр байдаркаларда, каноэларда һәм «аждаһа» көймәләрендә күрсәтмә чыгышлар ясаячак. Теләге булган һәркем «Җил көче» («Сила ветра») командасы оештырган җилкәнле көймәләр белән идарә итү остаханәсендә катнаша ала.
Әгәр узган елларда фестиваль Түбән Кабан күлендә генә узса, быел маршрут Ботаника ермагын да үз эченә алачак. Анда Назарбаев урамындагы күпер астыннан йөзеп үтеп булачак. Район башлыгы билгеләп үткәнчә, куркынычсызлыкка аеруча зур игътибар биреләчәк: бөтен маршрут буйлап коткаручылар, күнектермәннәр, өйрәтүчеләр һәм волонтерлар эшләячәк.
Спорт программасыннан соң, «Каспийка» рестораны янындагы яр буенда (Һади Такташ урамы, 35) кунакларны кояш баешындагы җәйге кичә көтә. Кичәдә DJ Баблгам һәм «Скрэтч диджей Скул» мәктәбе башкаручылары үз чыгышларын тәкъдим итәчәк. Шулай ук ачык һавада кино күрсәтү оештырылачак.
Исегезгә төшерәбез, «СапКультура» фестивале беренче тапкыр 2024 елда узган һәм ул вакытта 200гә якын катнашучыны җыйган.