ТР Үзәк сайлау комиссиясе Морозовны Думага өстәмә сайлауларда кандидат итеп теркәде
Дәүләт Думасына Татарстаннан сайланган депутат Олег Морозов «Бердәм Россия» партиясе үткәргән алдан тавыш бирүдә җиңде.
(Казан, 30 июль, «Татар-информ»). ТР Үзәк сайлау комиссиясе сенатор Олег Морозовны Түбән Кама сайлау округы буенча РФ Дәүләт Думасы депутатын өстәмә сайлауларда кандидат сыйфатында теркәде. Шул хактагы карар ТР Үзәк сайлау комиссиясе утырышында кабул ителде.
«Кандидат тарафыннан тәкъдим ителгән документлар федераль закон, шулай ук РФ Үзәк сайлау комиссиясе хокукый актлары таләпләренә туры килә», - диде ТР Үзәк сайлау комиссиясе сәркатибе Надежда Борисова.
Ул билгеләп үткәнчә, кандидатның документлары гамәлдәге закон нигезендә тикшерелгән. «Тикшерү нәтиҗәләре, шулай ук дәүләт органнарыннан килгән җаваплар кандидатны тәкъдим итү тәртибенең федераль закон таләпләренә туры килүе турында сөйли», - дип искәртте Борисова.