Сәясәт 26 ноябрь 2014 14:10

ТР ял көннәре, эшләми торган бәйрәм көннәренә туры килгән очракта, башка көнгә күчерелмәскә мөмкин

Бәйрәм көннәренә кагылышлы закон проекты кабул ителде

Скопировать ссылку

(Казан, 26 ноябрь, “Татар-информ”, Лилия Локманова). ТР ял көннәре, эшләми торган бәйрәм көннәренә туры килгән очракта, башка көнгә күчермәү турында бүген ТР Дәүләт Советынының дүртенче утырышында закон проекты кабул ителде.

ТР хезмәт, халыкны эш белән тәэмин итү һәм социаль яклау министры Эльмира Зарипова бу закон проектының кирәклеген икътисадка зыян килү, эш процесссының бозылу, гражданнарның, күп яллар нәтиҗәсендә, эш ритмнары үзгәрү белән аңлата.

Хәзерге вакытта Россиядә 14 көн ял итә торган бәйрәм көн дип игълан ителгән, Татарстанда шуларга тагын 4 көн өстәлә: Татарстан Республикасы көне, Татарстан Конституциясе көне, Ураза һәм Корбан гаете бәйрәмнәре. Эльмира Зарипова, чагыштыру өчен чит илләрдә ничә көн ял итүләренә мисаллар китереп үтте.

2014 елда татарстанлылар 118 көн ял иткән, бу һәр 3 нче көн ял дигән сүз. 1987 елда, мисал өчен, бәйрәм көннәре 9 гына булган.

Бу уңайдан парламентның социаль сәясәт комитеты җитәкчесе Светлана Захарова чыгыш ясады. “Без бер генә бәйрәмне дә бетермибез. Мондый тәҗрибә башка төбәкләрдә дә бар һәм үз бәйрәмнәре ялларга туры килгән очракта, алар башка көнгә күчерелми”, - диде ул.

Илдар Халиков та бәйрәмнәрнең шулкадәр күп булуы гражданнарда тискәре реакция тудыруын, Россиянең бәйрәмнәр һәм яллар буенча дөньяда беренче урында баруын ассызыклады.

ТР Прокуроры Илдус Нәфиков исә бу уңайдан үз фикерен җиткерде һәм әлеге закон проекты ТР Конституциясенә каршы килүен белдерде.

Парламентның мәгариф, мәдәният, фән һәм милли мәсьәләләр җитәкчесе Разил Вәлиев, шулай ук, әлеге закон проектына каршы булуын ассызыклады. Ул бу законның халык арасында шау-шу куптару, аңлашылмаучанлыклар китереп чыгару мөмкинлеген искәртте һәм Яңа ел бәйрәмнәрен кыскартырга кирәклеген белдерде.

ТР Дәүләт Советы Рәисе Фәрит Мөхәммәтшин бу уңайдан Дәүләт Думасында да, башка төбәкләр парламентларында да әлеге мәсьәләнең һәм бәйрәм көннәрен кыскарту буенча тәкъдимнәр булуын әйтеп үтте. “Без тормышыбызны тулысынча бәйрәмгә әйләндерә алмыйбыз”, - диде ул.

Нәтиҗәдә, закон проекты беренче укылышта кабул ителде. Төзәтмәләр исә 10 декабрьгә кадәр кабул ителә.

Сәхифәләр

ТР ял көннәре, эшләми торган бәйрәм көннәренә туры килгән очракта, башка көнгә күчерелмәскә мөмкин