news_header_top_970_100
news_header_bot_970_100

ТР мөфтие Ислам дөньясының күркәм бәйрәме - Корбан гаете белән котлый

Раббыбыз биргән нигъмәтләргә шөкер итү, фәкыйрьләргә һәм мохтаҗларга булышу, хәер-сәдакаләр өләшү безне Аллаһы Тәгаләгә якынайта, дип искәртә ул

 (Казан, 4 октябрь, “Татар-информ”). Татарстан Республикасы мөселманнары Диния нәзарәте рәисе, мөфти Камил хәзрәт Сәмигуллин, 4 октябрь – Корбан гаете уңаеннан, Татарстан мөселманнарына мөрәҗәгать белән чыкты.

“Бисмилләһир-рахмәнир-рахим!
Әссәламү галәйкүм вә рахмәтуллахи вә бәрәкатүһ!
Мөхтәрәм җәмәгать!
Татарстан Республикасы мөселманнары Диния нәзарәте һәм шәхсән үз исемемнән барлык татарстанлыларны олуг һәм мөбарәк Корбан гаете белән котлыйм! Ислам дөньясының күркәм бәйрәме – Корбан гаете барчаларыбызга хәерле булсын, иминлек, игелек, бәрәкәт алып килсен!

Елга бер мәртәбә килүче әлеге бөек бәйрәмне бөтен дөнья мөселманнары түземсезлек белән көтеп ала. Бу көнне дин кардәшләребез мәчетләрдә җәмәгать булып бәйрәм намазларын укыйлар, догалар кылалар. Аллаһ тарафыннан билгеләнгән, пәйгамбәрләр кылган вә безгә кушып калдырылган изге гыйбадәтләрнең берсе – Аллаһ ризалыгы өчен корбан чалу йоласын башкаралар. Корбан бәйрәме көнне Мәккәдәге хаҗилар исә хаҗ гыйбадәтенең төп гамәлләрен тәмамлыйлар.

Без Корбан бәйрәмен зурлап, гаиләләребезнең, туганнарыбызның, күршеләребезнең күңелен күреп, игелекле гамәлләр кылып, Аллаһы Тәгалә мәрхәмәтенә, ризалыгына ирешергә тырышабыз. Раббыбыз биргән нигъмәтләргә шөкер итү, фәкыйрьләргә һәм мохтаҗларга булышу, хәер-сәдакаләр өләшү безне Аллаһы Тәгаләгә якынайта. Рәхимле Раббыбыз Корбан бәйрәменә нәкъ менә шушы мәгънәне, ягъни Үзенә якынаю юлын салган.

Изге китап Коръәндә әйтелгән: “Аллаһ әмерләрен тыңлагыз, итагать итегез, үз мөмкинлекләрегездән чыгып, хәер-сәдака бирегез. Нәфесен тыя белгән кеше сәгадәткә ирешер” (Тәгабүн сүрәсе, 16 нчы аять) .

Пәйгамбәребез (с.г.в.) бер хәдисендә әйткән: “Мәрхәмәтле кешеләргә Аллаһы рәхмәт итәр. Җир йөзендә булганнарга сез мәрхәмәт итегез, күктә булганнар сезгә мәрхәмәт итәрләр”. Аллаһы Тәгаләнең иксез-чиксез мәрхәмәтенә барчабызга да ирешергә насыйп итсен!

Олуг гает көнендә бәйрәм намазларын укырга, корбаннар чалырга, күңелләребездәге мәрхәмәт, куаныч-шатлык хисен тирә-юньдәгеләргә җиткерергә язсын! Гаиләләребез нык, өйләребез нурлы булсын! Республикабызга бәрәкәт, ил-көннәребездә тынычлык, иминлек бирсен!” – диелә Татарстан мөфтие Камил хәзрәт Сәмигуллин тәбрикнамәсендә.

news_right_column_1_240_400
news_right_column_2_240_400
news_bot_970_100