Мәдәният 8 декабрь 2014 10:37

ТР Дәүләт җыр һәм бию ансамбле узып баручы елга нәтиҗәләр ясый

Ансамбльнең бию, хореография, оркестр төркемнәренең чыгышларын карарга, цехлар белән танышырга мөмкин булачак

Скопировать ссылку

(Казан, 8 декабрь, “Татар-информ”). Иртәгә көндезге 11 дә ТР Дәүләт җыр һәм бию ансамбленең узып баручы 2014 елга нәтиҗәләр чыгаруга багышланган матбугат конференциясе уздырыла.

Журналистлар белән очрашу вакытында ансамбльнең бию, хореография, оркестр төркемнәренең чыгышларын карарга, цехлар белән танышырга, үткәрелгән концертлар һәм гастрольләр хакында мәгълүмат алырга мөмкин булачак.

2014 елда ансамбль бик күп гастрольләрдә була. Коллектив Сочида уздырылган XI Паралимпия уеннары ачылышында, Мәскәүдә, шул исәптән Россиянең Зур театры сәхнәсендә, Томскида узган федераль Сабан туенда, Рига, Астана кебек шәһәрләрдә чыгыш ясый.

Дәүләт җыр һәм бию ансамбле Мартигта (Франция) узган милли мәдәниятләр фестивалендә катнаша, Казанда концертлар бирә. Татарстанда Мәдәният елы уңаеннан, республиканың районнарында тамашачы җыя, мастер-класслар оештыра.

Иртәгә буласы очрашуда ансамбльнең сәнгать җитәкчесе Айрат Хәмитов, баш балетмейстеры Раилә Гарипова, баш хормейстер Нияз Гәрәев катнашачак, дип хәбәр итә әлеге ансамбльнең матбугат хезмәте.

Сәхифәләр

ТР Дәүләт җыр һәм бию ансамбле узып баручы елга нәтиҗәләр ясый