news_header_top_970_100
news_header_bot_970_100

ТР буенча гадәттән тыш хәлләр министры урынбасары "Мастерс" турнирына әзерләнә

Илһам Насыйбуллин су тубы буенча "Динамо-Мәскәү" җыелма командасы составында чыгыш ясаячак

(Казан, 4 август, «Татар-информ», Алсу Гатауллина). Бүген ТР гражданнар оборонасы һәм гадәттән тыш хәлләр министры урынбасары, ТР буенча Гражданнар оборонасы һәм гадәттән тыш хәлләр министрлыгының эзләү-коткару хезмәте башлыгы, су тубы буенча СССРның спорт мастеры, күп тапкыр Россия чемпионы булган Илһам Насыйбуллин "Оргсинтез" бассейнында су тубы буенча күнекмә үткәрде. Ул "Мастерс" турнирына әзерләнә, анда "Динамо-Мәскәү" җыелма командасы составында чыгыш ясаячак.

Министр урынбасары журналистлар белән әңгәмәсендә сөйләгәнчә, чемпионатта катнашу аңа, беренче чиратта, кайчандыр су тубы уйный башлаган дуслары белән очрашу мөмкинлеген бирәчәк.

"Бүген мин 17 ел буе спорт белән шөгыльләнгән бассейнда. 1973 елда бассейн ачылды, мин яшүсмерләр разрядыннан башлап, спорт мастерына кадәр күтәрелдем. 9нчы сыйныфта "Синтез" спорт клубының төп составында уйнадым, аның белән бергә ил чемпионатында өч җиңү бәйрәм иттем, 4 көмеш һәм 3 бронза медаль яуладым. Мин шулай ук җыелма составында да уйнадым, анда 1981 елда СССР чемпионары исемен яуладык. Хәзер туган шәһәремдә дөнья чемпионатында катнашу мөмкинлеге бар. Мин "+50" категориясендә үз көчемне сынап карый алам. Биш тапкыр дөнья чемпионы булган "Динамо-Мәскәү" командасында чыгыш ясау минем өчен зур мәртәбә", - диде Илһам Насыйбуллин.

Аның сүзләренчә, "Мастерс" категориясендә дөнья чемпионатында катнашу тәкъдимен ул 2013 елда ук алган. Шуннан бирле ул көн саен диярлек бассейн, спорт залында шөгыльләнгән, күчмә ярышларда катнашкан.

Искәртеп узабыз: "Мастерс" категориясендә спортның су төрләре буенча дөнья чемпионаты 5-16 августта уза.   

news_right_column_1_240_400
news_right_column_2_240_400
Медиаметрикс
news_bot_970_100