Анталиядә яшәүче Гөлназ Җиһангирова: Татар китапханәсе шәһәр үзәгендә булуын теләгән идем
Китапханә ачылышы махсус «Йөрек-төрекмән» төрки халыклар халыкара фестиваленә туры китерелгән.
- ВКонтакте
- Telegram
- РћРТвЂВВВВВВВВнокласснРСвЂВВВВВВВВРєРСвЂВВВВВВВВ
- РњРѕР№ Р В Р’В Р РЋРЎв„ўР В Р’В Р РЋРІР‚ВВВВВВВВРЎР‚
Скопировать ссылку
Төркиянең Анталия шәһәре мэриясе бинасында, Анталия тарихын өйрәнү үзәгендә татар китапханәсе ачылган. Бу хакта «Татар-информ» агентлыгы хәбәрчесенә Анталиядә яшәүче музыка белгече, «Татарстан» мәдәният җәмгыяте җитәкчесе Гөлназ Җиһангирова әйтте.
«Татар халкының мирасы булып сакланган китапларның мин баштан ук шәһәр үзәгендә, бөтен кеше куллана алырлык уңайлы, матур җирдә булуын теләгән идем. Һәр китап уку залында укылачак, нәкъ шул бинада әдәби-музыкаль очрашулар үткәреләчәк», - диде әңгәмәдәш.
Китапханә ачылышында Татарстан Республикасыннан делегацияне җитәкләп килгән Бөтендөнья татар конгрессы Башкарма комитеты җитәкчесе Данис Шакиров, Анталия мэры урынбасары Дурмуш Али Арслан, Анталиядә яшәүче милләттәшләребез һәм башка кунаклар катнашкан.
Фото: © Гөлназ Җиһангированың шәхси архивыннан
Ул китапханә ачылышы махсус «Йөрек-төрекмән» төрки халыклар халыкара фестиваленә туры китерелгәнен искәртте. 13-15 сентябрьдә узган бу фестивальдә татарлар да үз осталыкларын, сәнгать үрнәкләрен, милли ризыкларын күрсәткән.
«Китапханә өчен шәхсән мин өйдәге китапларым арасыннан иң затлыларын сайладым, «Татарстан» мәдәният җәмгыяте әгъзалары да шул ук изге нияттә. Әлбәттә, анталиялеләр генә түгел, әлеге эшкә һәрбер кеше кушыла ала», - дип сөйләгән иде Гөлназ Җиһангирова фестивальгә әзерлек эшләре белән йөргәндә.
Ул Бөтендөнья татар конгрессыннан да китапханәгә бик күп төрле эчтәлекле, кыйммәтле китаплар бүләк ителгәнен әйтте.
Фото: © Гөлназ Җиһангированың шәхси архивыннан