Томск өлкәсендә Татар мәдәнияте фестивале ахырына якынлаша
23 марттан 30 апрельгә кадәр дәвам иткән фестиваль дистәгә якын мәдәни чараны берләштерә.
Скопировать ссылку
(Казан, 13 апрель, "Татар-информ"). Томск өлкәсендә Татар мәдәнияте өлкә фестивале ахырына якынлаша. Бу хакта Томск шәһәре татарлары милли-мәдәни автономиясе хәбәр итә.
23 мартта Татарстан атистлары концерты белән башланган фестиваль 27 апрель көнне шагыйрь Муса Җәлил иҗатына багышланган сәнгатьле сөйләм өлкәкүләм бәйгесе белән тәмамланачак.
Фестиваль кысаларында, 14 апрель көнне Татар мәдәнияте үзәгендә "Чишмәкәй" татар җырын башкаручылар конкурсы узачак. Балалар өчен оештырыла торган бәйге быел 12 нче тапкыр гамәлгә ашырыла.
20 апрельдә милләттәшләр "Татар иҗаты көне" иҗади кунакханәсен уздырырга ниятли. Чарада үзешчән шагыйрьләр катнашачак.
Моннан тыш, 23 марттан 30 апрельгә кадәр Татар мәдәнияте үзәгендә Габдулла Тукай иҗатына багышланган күргәзмә эшли.
