Төмәндә себер татар язучысы һәм шагыйре Клара Кучковская-Ярашова белән әдәби очрашу булды
Төмәндә «Пыяла» татар аш-суы йортында «Әдәби чәршәмбе» әдәби циклы кысаларында чираттагы очрашу булган. Бу юлы катнашучылар Төмән өлкәсе Себер татар шагыйрьләре һәм язучылары берлеге рәисе, язучы һәм шагыйрә Клара Кучковская-Ярашова белән очрашкан. Тыңлаучылар авторның туган телдәге проза әсәрләре белән танышкан. Бу хакта Себер татарлары милли-мәдәни автономиясе ВКонтакте социаль челтәрендәге төркемендә хәбәр итә.
Клара Кучковская-Ярашованың әдәби очрашуда тәкъдим ителгән хикәяләре себер татарлары, гади авыл кешеләре, эшчеләр, аларның 80-90нчы еллардагы тормышы турында. Авторның әсәрләре урыны белән көлдерә, кайвакыт елата, ә кайдадыр уйланырга мәҗбүр итә, диелә хәбәрдә.
«Әдәби чәршәмбе» әдәби циклы кысаларында атна саен үткәрелүче очрашуларда милләттәшләр әдәби темаларга фикер алыша, аралаша һәм традицион ризыклар белән чәй эчә.