Төмәндә «Себер йолдызы» һәм «Татар егете» бәйгеләре җиңүчеләрен бүләкләделәр
6 декабрьдә Төмәндә Себер татар яшьләре өчен иң мөһим чараларның берсе — «Себер йолдызы» һәм «Татар егете» төбәкара конкурсының финалы узды. Бу турыда Бөтендөнья татар конгрессы хәбәр итте.
Тубыл һәм Төмәндә үткәрелгән сайлап алу турларыннан соң, финалның гала-концерты «Нефтяник» Мәдәният йортында узды. Анда төрле төбәкләрдән иң сәләтле катнашучылар җыелды. Конкурсның төп бүләге — 300 000 сум — яшьләр өчен көчле мотивация булды.
Катнашучылар җырлау һәм бию осталыкларын, сәхнәдә үз-үзләрен күрсәтү сәләтләрен һәм татар традицияләрен тирәнтен белүләрен күрсәттеләр. Бигрәк тә катнашучыларның милли мирасны заманча тенденцияләр белән берләштерүләре сөендерде. Бу алым милли мәдәниятне киң аудиториягә аңлаешлы һәм кызыклы итеп күрсәтергә мөмкинлек бирә, диелә хәбәрдә.
Бәйге 2008 елдан башлап, Төмән өлкәсе Бөтендөнья татар конгрессы вәкиллеге ярдәмендә үткәрелә. Аның төп максаты — татар яшьләренең сәләтләрен ачу һәм аларга иҗади һәм социаль проектларны тормышка ашыруда ярдәм итү. «Себер йолдызы» һәм «Татар егете» конкурсы татар яшьләре өчен уникаль мәйданчык булып тора. Бу чара традицияләрне саклап, милли мәдәниятне үстерүгә зур өлеш кертә, диелә хәбәрдә.