Дин 15 апрель 2024 18:16

Йәмән Коръән хафизлары Төмәндә Мөхәммәт пәйгамбәрнең чәч бөртеге сакланган музейда булды

Скопировать ссылку

Рамазан ае дәвамында Төмән районы Ямбай авылы һәм Боровский бистәсе мәчетләрендә Йәмәннән Коръән-хафизлар Мөхәммәд Әхмәд Сәид һәм Хәмид Абдулбасит Али Коръәнне тулысынча яттан укыды. Хезмәтләре өчен рәхмәт йөзеннән, Төмән өлкәсе мөфтие Зиннәт хәзрәт Садыйков коллектив ифтарларның берсендә һәркайсына үз исеменнән Рәхмәт хатлары һәм истәлекле бүләкләр тапшырды. Бу хакта Россия мөселманнары Диния нәзарәте матбугат хезмәте хәбәр итә.

Төмәндә Йәмән кунаклары төбәктә яшәүче халыкларның мәдәнияте, тарихы һәм көнкүреше белән танышты. Алар өчен музейларга экскурсияләр оештырылды. Шулай итеп, гарәп хафизлары Ямбай авылы музеенда, Төмән шәһәренең туган якны өйрәнү музеенда һәм И.Я.Словцов исемендәге музей комплексында булды, анда Мөхәммәт пәйгамбәрнең чәч бөртеге саклана.

Үзенчәлекле ядкарь музей комплексының ябык биналарында саклана һәм гомуми күзәтүгә аерым очракларда гына куела. Йемен кунаклары өчен искәрмә ясадылар. Төмән өлкәсе мөселманнары Диния нәзарәте Ислам мәгърифәтчелек үзәге җитәкчелеге үтенече буенча, гарәп хафизларына бу бик сирәк экспонатны күрсәтте.

Хәмид Абдулбасит һәм Мөхәммәд Әхмәд Төмән диндәшләренә Себер мөселманнарының традицион дини кыйммәтләрен торгызу эшенә катнашканнары өчен рәхмәт белдерде. Кунаклар сүзләренчә, алар Төмән өлкәсендә Рамазан аенда җирле мөселманнар арасында зур шатлык һәм күңелле хисләр кичергән. Алар шулай ук дини өлкәдә Төмән өммәте белән хезмәттәшлекне алга таба да ныгытуга өметләрен белдерде.

Шунысын да билгеләп үтәргә кирәк, хафизлар Йәмән илчелеге белән РФ мөселманнары Диния нәзарәтенең хезмәттәшлек программасы кысаларында Төмән өлкәсе мөселманнары Диния нәзарәте чакыруы буенча килгән.

Сәхифәләр

Йәмән Коръән хафизлары Төмәндә Мөхәммәт пәйгамбәрнең чәч бөртеге сакланган музейда булды