Төмән татарлары иҗади үзәгенә татар мәдәнияте, халык уен кораллары белгечләре кирәк
Төмәннең «Яңарыш» газетасында Гөлнур Вәлиеваның «Татар телен бергәләп өйрәнәбез» дигән язмасы чыкты.
«Яңа сулыш», «Себер йолдызлары» телетапшыруларының «Татар телен бергәләп өйрәнәбез» проекты дүртенче ел дәвам итә.
Киләсе тапшыруларда Төмән районының Талымхан мәктәбе укучылары катнашалар. Алып баручы Эльмира Садыйкова проектта бу юлы «Яңарыш» газетасы белән дә таныштырачак. Ислам Сафин татар милли уеннары, татар җырларын өйрәтәчәк.
Тагын да өлкә татар милли-мәдәни автономиясе «Этнос» иҗади үсеш һәм гуманитар белем бирү үзәге белән бергәләшеп эш башлап җибәрде. Җитәкчеләр сөйләшеп, өстәмә юнәлешләр булдырдылар. Үзәккә татар телен белгән өстәмә белем бирү педагоглары (татар халкы мәдәнияте, вокал-хор буенча, хореограф); халык уен кораллары буенча студия җитәкчесе (курай, кубыз, сорнай, баян һ. б.) таләп ителә, диелә хәбәрдә.