Җәмгыять 8 май 2018 22:00

Әтнәдә тыл хезмәтчәннәрен, сугыш чоры балаларын хөрмәтләделәр

Соңыннан кунаклар Сәет Шәкүровның “Туган туфрак” спектаклен карады.

Скопировать ссылку

(Казан, 8 май, “Татар-информ", ”Әтнә таңы”). Бөек Җиңүгә үз өлешләрен керткән тыл хезмәтчәннәрен, сугыш чоры балаларын котлау тантанасы Габдулла Тукай исемендәге Әтнә дәүләт драма театры бинасында булды. Аларны бирегә алып килүне, сый-нигъмәт тулы табыннар белән каршы алуны оештыруда район хакимиятенең тырышлыгы зур булды. Соңыннан кунаклар Сәет Шәкүровның “Туган туфрак” спектаклен карадылар, дип яза район газетасы сайты.

Табыннарның мул булуыннан бигрәк, тамак тук заман, үзләрен искә алып хөрмәтләүгә күңелләре нечкәрде өлкәннәрнең. Араларында күз яшьләрен сөртүчеләр дә булды. Хәер, кабат бергә очрашып, үзара сөйләшү шатлыгыннан да тулгандыр ул күз яшьләре.

Район хакимияте аппараты җитәкчесе Гөлнара Реваль Галәүтдинова район башлыгы Габделәхәт Хәкимов исеменнән өлкәннәрне Бөек Җиңүнең 73 еллыгы белән котлап, сәламәтлек теләп, рәхмәтен әйтте. Районның ветераннар советы җитәкчесе Мингазиз Зиннәтов та ихлас котлап, узган авыр елларны искә алыр өчен шулай җыелып алуның кирәклеген ассызыклады.

“Изгелек” халыкка социаль хезмәт күрсәтү оешмасы, Олы Әтнә авыл җирлеге, Габдулла Тукай исемендәге Әтнә дәүләт драма театры бу бәйрәмнең күңелле узуы өчен кулларыннан килгәннең барын да эшләгәннәр.

#Әтнә таңы

Сәхифәләр

Әтнәдә тыл хезмәтчәннәрен, сугыш чоры балаларын хөрмәтләделәр