Тикшерү комитеты Татарстанга пилотсыз очу аппаратлары һөҗүмен тикшерәчәк
Россия Тикшерү комитеты Татарстанга беспилотниклар һөҗүмен тикшерәчәк. Һөҗүмдә зыян күрүчеләр дә булды, дип хәбәр итә комитет үзенең Телеграм-каналында.
Баштарак Татарстан хакимияте бүген Алабуга һәм Түбән Кама шәһәрләренә пилотсыз очу аппаратлары һөҗүме турында хәбәр иткән иде. Алты кеше зыян күргән. Җитди җимерелүләр юк, оешмаларда технология процессы бозылмаган.
«Россия Тикшерү комитеты тикшерүчеләре Белгород өлкәсенә, Татарстан республикасына һәм Донецкига Украина Кораллы Формированиеләре һөҗүмен тикшерәчәк. Татарстанга беспилотниклар һөҗүм итте, зыян күрүчеләр бар», – диелә хәбәрдә.
Шулай ук тикшерүчеләр ВСУның Белгородка һөҗүмен дә тикшерә, монда тугыз кеше зыян күрде. Ә Донецкиның Киев районына һөҗүмдә бер ир-ат яраланган.