Теләчедә журналист Галәветдин Зыятдинов истәлегенә багышланган бәйге игълан ителде
Теләче районында туып-үскән, ветеран журналист Галәветдин Зыятдинов истәлегенә багышланган «Яшь журналист» дип исемләнгән II иҗат бәйгесе игълан ителде. Бу хакта «Теләче-информ» хәбәр итә.
Бәйгене «Теләче-информ» мәгълүмат үзәге оештыра. Конкурс талантлы яшь журналистларны ачыклау һәм аларга ярдәм итү максатыннан үткәрелә. Гомуми белем бирү мәктәпләренең 6 -11 сыйныф укучылары һәм студентлар катнаша ала. Конкурс эшләре рус яки татар телләрендә, видеоязмалар рәвешендә башкарыла (регламент – 5 минутка кадәр).
Тәкъдим ителгән темалар:
1. «Авыл» (авыл хуҗалыгы темалары)
2. «Репортаж» (мәктәп чараларыннан репортажлар);
3. «Шәхес» (районның күренекле кешеләре);
5. «Сәламәтлек» (сәламәтлекне саклау);
6. «Халык традицияләре» (гореф-гадәтләр, милли бәйрәмнәр);
7. «Гаилә» (буын мөнәсәбәтләре).
Иҗади эшләр tulinf@rambler.ru почта адресына яисә 89393967641 номерына 1 майга кадәр кабул ителә.