Теләчедә иң яхшы музейларның эш тәҗрибәсен өйрәнгәннәр
«Теләче-информ» мәгълүмат үзәге һәм Туган якны өйрәнү музее хезмәткәрләре «Музейный десант» дип исемләнгән бәйгедә җиңүчеләрне бүләкләгән. Бәйге райондагы музейларның эш тәҗрибәсен өйрәнүгә багышланган.
«Катнашучыларның тагы да күбрәк булуын теләгән идек, чөнки районда балалар бакчалар, мәктәп, оешмаларда музей яки музей почмаклары юк түгел. Чарада кече яшьтәге мәктәп балалары, укучы, укытучы, тәрбиячеләр катнашты. Буыннар бәйләнеше, халкыбызның бай рухи мирасын, гореф-гадәтләрен киләчәк буыннарга җиткерүдә туган якны өйрәнү музейлары оештыру бик әһәмиятле», - диде «Татар-информ»га «Теләче-информ» мәгълүмат үзәге хәбәрчесе Зөлфия Ибраһимова.
Җиңүчеләр исемлеге:
- Гран – при – Теләче район суды
- 1 урын - Үзәк мәктәбе музее
- 2 урын - Шәтке мәктәбе музее
- 3 урын – 3 номерлы балалар бакчасы музее.
«Музейдагы кечкенә генә экспонат та зур вакыйганы күзалларга ярдәм итә, әби-бабаларыбызның тарихын онытмаска булыша. Чара райондагы иң яхшы музейларның эш тәҗрибәсен ачыклау һәм туган якны өйрәнү өлкәсендә белемнәрне тирәнәйтү максатыннан оештырылды», - дип аңлатты ул.
Җиңүчеләргә истәлекле бүләкләр һәм дипломнар тапшырганнар. Калган барлык катнашучыларга сертификатлар биргәннәр. «Чараның иганәчесе – төзелеш материаллары белән сәүдә итүче Заһир Гайнетдиновка зур рәхмәтебезне белдерәбез», - диде Зөлфия Ибраһимова.