Тел һәм тарих белгече Тәүзих Ибраһимов вафат булган
Скопировать ссылку
Казан (Идел буе) федераль университеты доценты, фән кандидаты, тел һәм тарих белгече, уку әсбаплары авторы, «Татар теленең язма корпусы» проекты авторларының берсе Тәүзих Ибраһимов вафат булган.
«15 июньдә вафат булды. Үзенең гомерен татар телен өйрәнүгә багышлады. Соңгы берничә ел эшләмәде, яше бар иде бит. Казанда җирләнде. Урыны җәннәттә булсын», – диде «Татар-информ»га филология фәннәре кандидаты Мансур Сәйхунов.
- Тәүзих Ибраһим улы Ибраһимов 1938 елның 23 октябрендә туа. 1971 елның 26 мартында «Татар әдәби телендә иҗекләр барлыкка килү һәм аларның тезмәләре структурасын өйрәнү» темасына диссертация яклап, филология фәннәре кандидаты дигән дәрәҗәле исем ала. Галим татар сүзләренең структурасын тикшерә, аның эшләнмәләре нигезендә татар телен цифрлаштыру методлары эшләнә. Беренче белеме буенча ул радиофизик була.