Тел галиме Башкортстанда яшәүче татарлар сөйләшенең әдәби телгә бик якын булуын әйтте
Башкортстанда татар теле урта диалектының Минзәлә сөйләше киң таралган.
(Казан, 19 февраль, «Татар-информ», Рифат Каюмов). Галимҗан Ибраһимов исемендәге Тел, әдәбият һәм сәнгать институты директоры урынбасары, филология фәннәре кандидаты Олег Хисамов Башкортстанда яшәүче татарларның сөйләшен татар әдәби теленә якын дип саный.
«Башкортстан татарлары мишәр һәм урта диалектларында сөйләшә. Урта диалектның минзәлә сөйләше бу территориядә иң киң таралганы. Ул 1,5 млн халыкны колачлый. Урта диалектның Минзәлә сөйләше татар әдәби теленә иң якыннарының берсе булып санала», — диде Олег Хисамов «Татар-информ»да узган матбугат конференциясендә.
Олег Хисамов алдарак татар теле диалектлары арасында аерма зур булмавын һәм диалектлар телебезне бүлгәләмәвен әйткән иде.
Галерея: XXI гасыр татар лексикографиясенә багышланган матбугат конференциясеннән фоторепортаж