"Тел" дип сөйләгәнче, башта "милли кием" дип сөйләргә кирәк – Кадрия Идрисова
“Ак калфак” оешмасы җитәкчесе фикеренчә, шул рәвешле без башка милләт вәкилләрендә үзебезгә карата хөрмәт уята алачакбыз.
(Казан, 26 гыйнвар, “Татар-информ”, Гөлнар Гарифуллина). Безгә күпмедер дәрәҗәдә үзебезнең милли киемнәрне кайтару кирәк – “Ак калфак” бөтендөнья татар хатын-кызлары оешмасы җитәкчесе Кадрия Идрисова шулай дип саный. Бу фикерен ул Бөтендөнья татар конгрессында Төмән өлкәсе Ялутор шәһәреннән килгән “Сандугач” халык ансамбле белән очрашу вакытында белдерде.
“Без үзебезнең йолалар, гореф-гадәтләрне онытып барабыз. Безнең оешма шуларны кайтару юнәлешендә эшли. Киемнәрне күпмедер дәрәҗәдә кире кайтару зарур. Нәкъ элекке киемнәр булмаса да, шушы елларга туры килгән киемнәр”, - дип Кадрия Идрисова заманча милли киемнәрнең әһәмиятен билгеләп үтте. “Сез үзегез дә бүген бертөрле киемдә булуыгыз белән матур. Әле бөтенегез төрле киемдә килеп утырган булсагыз, болай матур күренмәс идегез. Яшерен-батырын түгел. Күлмәгегезгә камзулыгыз, калфагыгыз, читегегез дә килешле, бизәнү элементлары булган алкаларыгызга кадәр туры килә”, - дип мөрәҗәгать итте Кадрия Идрисова себер татарларына.
“Калфаклар кире кайта дип уйлыйм мин. Хәзер кайсы гына төбәккә барсак та, калфакны тегәләр дә, чигәләр дә. Элек әле бу әйберләрне кертү авыр иде. Без монда чит төбәкләрдән, илләрдән чакырып, калфак, изүләр тегәргә өйрәттек”, - дип сөйләде ул.
“Ак калфак”ның планнары, максатлары зур. Динебезне, телебезне, гореф-гадәтләребезне кайтарырга кирәк дибез. Һәрвакыт тел дип сөйлибез. Тел дип сөйләгәнче, башта кием дип сөйләргә кирәк. Башта киемебезгә кайтабыз икән, үзебезнең милләт киемен кигән кешенең башка телдә сөйләп йөрисе килмәс. Үзебезнең киемнәрне киябез икән, тел дә, моңнар да кайтачак. Без шул рәвешле башка милләт вәкилләрендә үзебезгә карата хөрмәт уята алачакбыз. Әгәр дә үзебез белән горурланып яшибез икән, безгә һәркем сокланачак”, - дип белдерде Кадрия Идрисова.