Теләче белгечләре ясалма орлыкландыруның Европа ысулын өйрәнде
Теләчедә ветеринария табиблары, ясалма орлыкландыру техниклары өчен семинар-уку үткәрелгән.
(Теләче, 29 май, “Татар-информ”, "Теләче", Фәнил Нигъмәтҗанов). Теләче районының “АгроЛак” җаваплылыгы чикләнгән ширкәте базасында ветеринария табиблары, ясалма орлыкландыру техниклары өчен семинар-уку үткәрелде. Бу юлы алар ясалма орлыкландыруның Европа ысулын өйрәнде. Бу турыда җирле басма хәбәр итә.
Мал табибларын, ясалма орлыкландыру техникларын ясалма орлыкландыру серләренә Татарстан Авыл хуҗалыгы һәм азык-төлек министрлыгының нәсел эше буенча бүлек җитәкчесе Рөстәм Сәетов төшендерде.
Авыл мәдәният йортында ул белгечләргә ачык дәрес үткәрде, видеофильм күрсәтте. Практик өлештә ул теләккә килгән сыерны ясалма орлыкландырып күрсәтте.
Семинар - уку барышында ул мал табибларының, ясалма орлыкландыру техникларының күпсанлы сорауларына җавап та бирде.
Семинар-укуда районда әлеге юнәлештә иң уңышлы эшләп килүче җаваплылыгы чикләнгән “АгроЛак” ширкәте җитәкчесе Фәрит Гыйләҗетдинов, җаваплылыгы чикләнгән “Игенче” ширкәтенең ясалма орлыкландыру технигы Илшат Гыйльметдиновлар үзләренең эш тәҗрибәләре белән уртаклашты.