Театр белгече Иран театры турында лекция укыды
Кристина Матвиенконың лекциясе "Нәүрүз" театр фестивале кысаларында оештырылган иде.
(Казан, 4 июнь, «Татар-информ», Рузилә Мөхәммәтова). Иранда спектакль куелганчы пьесаны махсус комиссия расларга тиеш, шунсыз ул спектакльгә билетлар сатыла алмый. «Нәүрүз» театр фестивале кысаларында театр белгече Кристина Матвиенконың Иран театры үзенчәлекләре турында лекциясе үтте.
Кристина Матвиенко Иран тамашачысының театр белән кызыксынуын билгеләп үтә. Ул театр билетларының бик арзан торуы тамашачыны театрга якынайтучы фактор дип саный. Театр белгече спектакльләр карарга килүче яшьләрнең күплеген билгеләп үтте.
Кристина Матвиенко Иран театры турында үзе катнашкан «Фаджр» Иран театр фестивале аша фикер йөртүен әйтте. Аның лекциясе нигездә спектакльләрнең эчтәлегенә кагыла иде.
Ул Иранда театр белеменең Станиславский системасына бәйлелеген күзәткән. Шулай ук көнбатыш театры үрнәкләренә омтылышын да күзәткән.
Быел “Буа: диалог киңлегендә” театр фестивалендә Иран театры катнашты. Буа театр фестиваленә Иран әзербайҗаннары театр коллективы килгән иде. Алар фарсы телендә уйнадылар. Мәхәббәт өчпочмагына бәйле сюжет булса да, спектакль ир-ат белән хатын-кыз бер-берсенә кагылмыйча уйнарлык итеп куелган иде.