«Татмедиа»да Иделия Марсның китабы тәкъдим ителде
«Татмедиа» бинасындагы «Әдәби кафе»да язучы һәм сценарист Иделия Марсның «По ту сторону двери» китабының презентациясе узды. Китап психологик триллер жанрында язылган, анда укучы төп герой Лили белән бергә серле һәм мавыктыргыч табышмаклар дөньясына чума.
«Китап тышлыгыннан ук карашны җәлеп итә, анда серле ишек сурәтләнгән. Анда мистика, драма һәм романтизм элементлары бар. Әсәр мин Калифорния университетында сценаристлыкка укыганда барлыкка килде. Персонажларны тасвирлау һәм эмоцияләрне бирүдә минем билгеле бер стилем бар», — дип сөйләде автор.
Язучы сүзләренә караганда, укучыны җәлеп итү һәм сюжет линиясендә киеренкелек булдыру өчен, ул аудиториянең игътибарын сакларга һәм эмоциональ реакция тудырырга ярдәм итүче төрле алымнар кулланган. Аларның кайберләре: һәр бүлектә яңа детальләр, конфликт һәм сюжет борылышлары өстәү.