Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Татарстанның халык артисткасы Раушания Юкачева каберенә таш куелды
![Татарстанның халык артисткасы Раушания Юкачева каберенә таш куелды](https://tatar-inform.tatar/images/uploads/photo/2024/5/14/d094093ebcf181bd0663800f7120a32a.jpg)
Татарстанның Питрәч районы Күн авылында Раушания Юкачева каберенә таш куелды. Әлеге уңайдан артистны туганнары, хезмәттәшләре, авылдашлары искә алды.
- Татарстанның халык артисткасы Раушания Юкачева 2022 елның 17 июлендә 63 яшендә вафат булган иде. Ул туган авылы – Питрәч районы Күн авылында җирләнде.
Раушания Юкачеваның кызы Светлана Хаметова таш куярга ярдәм итүчеләргә һәм искә алырга килүчеләргә рәхмәтен белдерде.
«Хөрмәтле Камал театры артистлары, авылдашлар сезгә бик зур рәхмәт, әнине зурлап искә алырга килгәнегез өчен. Мин әнине бик сагынам, юксынам. Камал театрының җитәкчеләренә шундый матур ташны ясатырга финанс яктан ярдәм күрсәткәннәре өчен зур рәхмәтемне җиткерәм. Ташның авторы Дмитрий Кузнецов аны нәкъ без теләгәнчә ясап бирде, рәхмәт», – диде ул.
Күн авылына Раушания Юкачеваның хезмәттәшләре, Камал театры артистлары да кайткан иде, алар үзләренең истәлекләре белән уртаклашты. Татарстанның халык артисты Әсхәт Хисмәт Раушания Юкачева белән озак еллар бергә уйнавын искә алды.
«Мондый вакыйгалар булырга тиеш, без шулай мәрхүмнәрне искә алырга тиеш. Рәхмәт сезгә, килгәнегез өчен. Без Раушания белән шактый гына бергә уйнадык, ләкин күп кеше безне шушы Күн авылының Акбае һәм Тәмлетамак мәчесе итеп хәтерлидер. Бөтен җирдә яраттылар, бөтен җирдә «Акбай абый, Тәмлетамак апа», – дип каршы алалар иде. Берни эшләп тә булмый, барыбызга да шунда китәсе, Раушаниянең урыны оҗмахта булсын», – диде ул.
Татарстанның халык артисткасы Венера Шакирова Раушания Юкачева белән якын дуслар булуын сөйләде.
«Аның тормыш юлы шулкадәр катлаулы һәм бик бәхетле булды. Ул шундый матур гаиләдә туган, әнисен үзе карап җирләде. Туганнары аны бик яратты, ул искиткеч бала үстерде, кияве белән бик дус булды. Раушания күп кырлы талант иясе генә түгел, чын кеше, безнең өчен чын дус була белде. Без аны йөрәгебездә мәңге сакларбыз, ул – татар халкының ялкынлы, матур ханымы иде, урыны җәннәт түрләрендә булсын», – диде ул.
Искә алу мәрасимен Татарстанның халык артисты Фәнис Җиһанша алып барды. Чарада Татарстанның халык артисткасы Люция Хәмитова, Татарстанның атказанган мәдәният хезмәткәре Фердинанд Хафизов, Раушания Юкачеваның авылдашлары һәм туганнары катнашты. Күн авылы мәчете имам-хатыйбы мәрхүмә рухына дога кылды.
- Юкачева Раушания Хөснетдин кызы 1959 елның 18 февралендә Татарстанның Питрәч районы Күн авылында туа. 1981 елда Казан театр училищесын тәмамлый һәм Әлмәт театрында эшли башлый.
- 1983 елдан — Татар академия театрында. Ул иҗат иткән төрле сөйкемле яшь хатын-кыз образларына йомшаклык, лиризм хас. Рольләре: Зөлфия — «Зөлфия» (К.Әмиров); Зарима — «Китәм инде» (Р.Хәмид); Наташа — «Һаваларда йолдыз» (М.Горький буенча); Гайни — «Бәхетсез егет» (Г.Камал); Айшә — «Без китәбез, сез каласыз», Тәмлетамак — «Авыл эте Акбай», Саҗидә — «Диләфрүзгә дүрт кияү» (Т.Миңнуллин); Әминә — «Ләйсән ире Хәсән» (Ю.Сафиуллин); Сәкинә — «Мирас» (Г.Каюм); Фирдәвес — «Казан егетләре», «Тагын Казан егетләре», Руфия — «Бичура» (М.Гыйләҗев); Маша — «Боз астында дулкын» (Ә.-Т.Рахманкулов); Нина — «Тол ханымда тукталыш» (Э.Лабиш); Мәрфуга — «Саташкан сандугач» (Р.Зәйдулла); Дригамбәр — «Портфель», Танай — «Җирән чичән һәм Карачәч сылу», Бәди – «Гөлҗамал» (Н.Исәнбәт); Саҗидә — «Килә ява, килә ява...», «Ява карлар, ява карлар...» (З.Хәким); Сәвия — «Мәхәббәт турында сөйләшик», Җәүһәрова Ландыш – «Суган чәчәге» (И.Зәйниев) һ.б.
Кызыклы яңалыкларны күзәтеп бару өчен Телеграм-каналга язылыгыз