Татарстанның Тукай районы Шилнәбаш авылында 100 урынга исәпләнгән заманча мәктәп ачылды
Татарстанның Тукай районы Шилнәбаш авылында «Мәгариф» илкүләм проекты кысаларында 100 урынга исәпләнгән заманча мәктәп ачылды. Бу хакта «Якты юл» газетасы хәбрә итә.
Бу мөһим вакыйгада район башлыгы Фаил Камаев, ТР Мәгариф һәм фән министры Илсур Һадиуллин, район мәгариф идарәсе башлыгы вазифаларын башкаручы Эльмира Низамиева, район мәктәпләрендә белем һәм тәрбия бирүче педагоглар, авыл җирлекләре башлыклары, хакимияттә төрле вазифа башкаручы җитәкчеләр катнашты. Шилнәбашлыларның шатлыгын уртаклашырга район авылларыннан байтак кунак килгән иде.
Аннары район башлыгы һәм министр «Мәктәпкә җыенырга ярдәм ит» Республика хәйрия акциясе буенча беренче сыйныфка баручы җитмеш җиде балага мәктәп әсбаплары тутырылган портфельләр өләште.
Тантананың иң дулкынландыргыч өлеше мәктәпнең символик ачкычын тапшыру мизгеле булды. Шилнәбаш гомумбелем бирү мәктәбе директоры Татьяна Калугина «Газстройсервис» ҖЧҖе директоры Равил Ярмиев кулыннан символик ачкычны кабул итеп алды.