Татарстанның Тәтеш районы морягы хәрби бүләккә ия булган

Татарстанның Тәтеш районында туган Кирилл Зайцев балачактан ук диңгез һәм флотта хезмәт итү турында хыялланган. Хезмәт вакыты җиткәч, ул хәрби комиссариатта үзен флотка җибәрүләрен сорый. 2012 елның ноябрендә ул Севастопольгә командировкага җибәрелә.

Өч ай укудан соң ул йөзү составына эләгергә исәп тоткан, әмма сәламәтлеге буенча үтә алмаган. Нәтиҗәдә, радиация, химик һәм биологик саклану гаскәрләрендә машина йөртүче булып хезмәт иткән. Әмма Армия хезмәте тәмамланганнан соң үз хыялыннан баш тартмаган. Контракт буенча армиядә калырга карар кыла һәм кабат медкомиссия уза. Бу юлы корабль экипажында хезмәт итү өчен сәламәтлек нормасы җитәрлек булып чыга.

Зайцевны «Суздаль» кече корабльгә комендор-оператор сыйфатында билгелиләр. Ул артиллерия установкасы белән идарә итә. 2016 елда, өч ел хезмәт иткәннән соң, Кирилл Сириягә хәрби походка китә. «Суздаль»нең бурычы портларны саклау, суднолар йөрешенең иминлеген тәэмин итү һәм судноларны озата бару була. Аның сүзләренчә, экипаж һәрвакытта да теләсә нинди хәлгә әзер булган, әмма хәрби бәрелешләргә кадәр эш барып җитмәгән. Хезмәт вакытында ул биш диңгездә – Кара, Эгей, Мәрмәр, Урта Диңгез һәм Азов диңгезләрендә була, Босфор бугазын уза.

Квалификациясен күтәрү өчен Зайцев «радиотехник» белгечлеге буенча Нахимов исемендәге Кара диңгез югары хәрби-диңгез училищесын тәмамлый. Хәзер ул диверсиягә каршы катерда гидроакустик булып хезмәт итә. Аның сүзләренчә, экипаж су астыннан килеп чыга торган куркынычны ачыклау һәм нейтральләштерү белән шөгыльләнә. Махсус хәрби операция башланганнан соң Кара диңгез суларында күп кенә экипажсыз катерлар барлыкка килә, алар разведка алып бара һәм мәгълүматларны тапшыра ала.

Шундый дроннарның берсен Зайцев таба һәм юк итә алган. Бу гамәле өчен ул «Батырлык өчен» медале белән бүләкләнә. Ул флотта эшләү даими игътибар һәм ашыгыч хәлләргә әзерлек таләп итә, дип белдерә. Дошман водолазлары һәм пилотсыз катерлары реаль куркыныч тудыра, һәм аның бурычы – куркынычны вакытында ачыклау һәм атакаларны булдырмау.

Диверсиягә каршы катер экипажы нибары сигез кешедән тора, әмма уртак хезмәт елларында алар чын командага әверелгән. Кирилл ассызыклаганча, хезмәт нык игътибарлы булуны сорый.

Моряк хезмәтен яратуга карамастан, ул өйгә кайтырга һәрвакыт шат, анда аны хатыны Анастасия һәм Севастопольдә туган улы Арсений көтә. Ул узган ел туган ягы Тәтешкә сәфәрен җылылык белән искә ала, анда ул озак вакыт эчендә беренче тапкыр Хәрби-диңгез флоты көнен билгеләп үткән. Аның сүзләренчә, флотта хезмәт иткән кешеләр арасында яшьләр дә, өлкән буын вәкилләре дә булуын күрү аеруча күңелле – һәм алар барысы да хезмәтен горурланып искә ала.

Материал Галина Таҗетдинова ярдәме белән әзерләнде.