Татарстанның 30 балалар бакчасы «Иң яхшы билингваль балалар бакчасы» грантын алды
18 ноябрьдә Казан шәһәре Авиатөзелеш районының 348нче номерлы балалар бакчасында «Иң яхшы билингваль балалар бакчасы» республика гранты җиңүчеләрен бүләкләү тантанасы булды. Бу хакта Татарстан Мәгариф һәм фән министрлыгы хәбәр итте.
Тантанада ТР мәгариф һәм фән министры Илсур Һадиуллин, ТР мәгариф һәм фән министры урынбасары Минзәлия Закирова, ТР Мәгариф үсеше институты, Казан педагогика көллияте вәкилләре, мәгариф идарәсе органнары белгечләре, шулай ук грант отучы балалар бакчалары җитәкчеләре һәм педагоглары катнашты.
2025 елда грант алуга республиканың 31 муниципаль берәмлегеннән 35 мәктәпкәчә белем бирү оешмасы гариза җибәргән.
Конкурсның сайлап алу йомгаклары буенча республиканың 30 мәктәпкәчә белем бирү оешмасы грант иясе булды.