Татарстанның Югары Ослан районында коткаручылар югалган хатын-кызны эзлиләр
Түбән Осланда яшәүче 68 яшьлек хатын-кыз зарядкасы беткән кәрәзле телефон һәм күлмәк алып,өйдән чыгып киткән.
(Казан, 22 август, «Татар-информ»). Татарстанның Югары Ослан районында коткаручылар һәм волонтерлар югалган хатын-кызны эзлиләр. Бу хакта “Татар-информ”га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
Ашыгыч хезмәтнең 112 бердәм номерына Түбән Ослан авылында яшәүче 68 яшьлек хатын-кызның көндезге 1 тирәсендә өйдән чыгып китүе һәм юкка чыгуы турында хәбәр кичә көндез килгән. Хатын-кыз зарядкасы беткән кәрәзле телефон һәм күлмәк алган.
Берничә сәгать буе туганнары аны үзләре эзләргә тырышкан, аннары коткаручыларга мөрәҗәгать иткәннәр.
2 нче зональ янгын сүндерү-коткару бүлеге хезмәткәрләре эзләү эшләренә кичке 18 сәгать тирәсендә керешкәннәр. Алар «Идел» бакчачылык ширкәтен һәм якындагы 11 гектар мәйданны тикшергәннәр, әмма хатын-кызны таба алмаганнар.
Бүген эзләү эшләренә кинологлар, волонтерлар һәм урманчылар кушылган.
