Мәдәният 27 июль 2007 15:20

Татарстанның яшь талантлары “Көнчыгыш аһәңнәре” дип исемләнгән бәйгедә катнаша

Скопировать ссылку

(Казан, 27 июль, “Татар-информ”, Рәсилә Кәримова). Татарстанның яшь талантлары — Н.Җиһанов исемендәге Казан дәүләт консерваториясе студентлары Айдар Вәлиев белән Фәрит Фәйзрахманов 25-31 август көннәрендә Сәмәркандта узачак “Көнчыгыш аһәңнәре” (“Шарк тароналари”) дип исемләнгән халыкара бәйгедә катнаша.

“Шарк тароналари” фестивале 1997 елдан бирле ике елга бер тапкыр үткәрелеп килә. Аның төп максаты — милли музыка сәнгатен популярлаштыру, халыклар традицияләрен саклау һәм үстерү, яшь буында шул матурлыкка мәхәббәт тәрбияләү. Моннан тыш, ала таба халыкара элемтәләрне киңәйтү һәм дәвам итү, дуслыкны ныгыту да — әлеге чараның максатларыннан.

Фестиваль кысаларында “Милли җырны иң яхшы башкаручы” дигән бәйге дә үткәрелә. Анда катнашучыларның чыгышы башкару осталыгы, миллилек, шәрыкча кием, сәхнәдә үз-үзеңне тоту кебек кретерийлардан чыгып бәяләнәчәк.

ТР Мәдәният министрлыгыннан алынган мәгълүматларга караганда, Гран-прига лаек булучыга 10000 Америка доллары күләмендә, ә призлы урыннар яулаучыларга 7000, 5000, 3000 Америка доллары күләмендә акчалата премияләр каралган.

“Көнчыгыш аһәңнәре” Үзбәкстан Мәдәният эшләре һәм спорт министрлыгы, “Үзбәкнаво” эстрада берләшмәсе, Үзбәкстан милли телерадикомпаниясе, Үзбәкстан Композиторлар берлеге һәм Сәмәрканд өлкәсе хакимияте тарафыннан оештырыла.

Сәхифәләр

Татарстанның яшь талантлары “Көнчыгыш аһәңнәре” дип исемләнгән бәйгедә катнаша