Татарстанның дүрт районында быел бер мини-ферма да төзелмәгән
Бу исемлеккә Бөгелмә, Минзәлә, Алабуга, Менделеевск районнары кергән.
(Чаллы, 19 август, "Татар-информ", Гөлнар Гарифуллина). Быел Бөгелмә, Минзәлә, Менделеевск, Алабуга районнарында бер мини-ферма да төзелмәгән. Бу хакта бүген Тукай районында авыл халкының эшлеклелек активлыгын арттыруга багышланган зональ семинар-киңәшмәдә билгеле булды.
Бу зонага кергән Актаныш районында быел 40, Тукай районында 16, Азнакайда 12, Мөслимдә 8, Зәйдә 6, Түбән Кама белән Ютазы районнарында бишәр, Сарман, Әгерҗе, Баулы районарында өчәр мини-ферма төзелгән.
Министр әйтүенчә, Татарстанда соңгы биш елда 1850 мини-ферма төзелгән, шул исәптән 276сы быел.
"Республикада 800 дән артык авыл җирлеге бар дисәк, 270 нәрсә ул?! 500 дә әз әле. Һәр авыл җирлегендә елына, ким дигәндә, бер мини-ферма төзергә, бу эшне көчәйтергә тиешбез", - ди Марат Әхмәтов.
Ул мини-ферма төзелешенә 83 млн сум күләмендә субсидиягә гаризалар кабул ителгәнен әйтте. "Районнар мәгълүматы буенча, тагын 57 млн сумга 200 мини-ферма буенча документлар әзерләнә. Барлыгы 140 млн сумга заявкалар көтәбез", - диде.