Икътисад 17 декабрь 2016 12:13

Татарстанның дәүләт бурычы быел 94,8 миллиард сумны тәшкил итәчәк

Ел башы белән чагыштырганда дәүләт бурычы күләме 3,5 миллиард сумга артачак.

Скопировать ссылку

(Казан, 17 декабрь, "Татар-информ", Надежда Гордеева). Ел нәтиҗәләре буенча Татарстанның дәүләт бурычы 94,8 миллиард сумны тәшкил итәчәк. Бу хакта бүген Татарстан Финанслар министрлыгы, Федераль салым хезмәтенең Татарстан идарәсе һәм Федераль казначылыкның Татарстан идарәсе коллегиясендә министр Радик Гайзатуллин хәбәр итте.

Министр сүзләренчә, ел башы белән чагыштырганда, дәүләт бурычы күләме 3,5 миллиард сумга артачак. “Бурычлар федераль бюджеттан җәлеп ителгән кредитларның күләме арту исәбенә үсте", - дип аңлатты ул.

Радик Гайзатуллин сөйләгәнчә, быел федераль бюджеттан барлыгы 5,7 миллиард сумлык бюджет кредитлары алынган. 2,2 миллиард сум кайтарылган. “Республика федераль бюджет кердитларын кайтару буенча федераль бюджет алдында үзенең барлык бурычларын да вакытында үти”, - дип искәртте министр.

“Федераль кредитлар җәлеп итү өчен Россия Финанслар министрлыгы белән Татарстан Министрлар Кабинеты арасында тиешле килешүләр төзелгән иде, аларда республика бюджеты өчен аерым индикаторлар билгеләнгән. Ел нәтиҗәләре буенча андагы барлык индикаторлар да үтәләчәк”, - дип өстәде ул. Министр республиканың коммерция кредитлары буенча бурычлары булмавын искәртте. “Ел нәтиҗәләре буенча муниципаль берәмлекләрдә бурычларның гомуми күләме 29,9 миллиард сумны тәшкил итә”, - дип әйтте министр.

#Радик Гайзатуллин #Финанслар министрлыгы #Антон Силуанов

Сәхифәләр

Татарстанның дәүләт бурычы быел 94,8 миллиард сумны тәшкил итәчәк