Татарстанның баш санитария табибы мәктәпләрдә тәнәфес вакытын арттырырга тәкъдим итә
Хәзерге тәнәфесләр системасы буенча укучыларга тукланыр өчен вакыт җитми, ди Марина Патяшина.
(Казан, 29 гыйнвар, "Татар-информ", Айдар Әхмәдиев). Мәктәпләрдә төшке аш ашау өчен тәнәфес вакытын арттырырга кирәк. Кулланучылар хокукын яклау һәм кеше иминлеге өлкәсендә күзәтчелек буенча федераль хезмәтнең Татарстан буенча идарә җитәкчесе, Татарстанның баш санитария табибы Марина Патяшина шундый фикерен йомгаклау коллегиясендә әйтте.
"Хәзерге тәнәфес системасы укучыларга тукланыр өчен җитәрлек вакыт калдырмый. Шул сәбәпле мәктәп ашханәләрендә өстәлләр алдан ук әзерләп куела һәм балалар килгәндә ризык суынып беткән була. Балалар суынган ризыкны ашудан баш тарта", - диде ул.
"Шуңа күрә тәнәфес вакытын арттыру урынлы булыр дип саныйм", - диде Марина Патяшина.