Татарстанның Актаныш районында аерылып киткән боздан сигез балыкчыны коткарганнар
Бу хәл Әҗәкүл авылы янында Агыйдел елгасында булган.
Скопировать ссылку
(Казан, 7 апрель, «Татар-информ»). Татарстанның Актаныш районында аерылып киткән боздан сигез балыкчыны коткарганнар. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
«Бүген көндез 112 бердәм номерына Әҗәкүл авылы янында аерылып киткән бозда балыкчылар булуы турында хәбәр килде.
Урынга 103 нче янгын часте сүндерүчеләре, шулай ук Актаныш һәм Кызыл Кама оператив төркемнәре китте», – дип сөйләделәр Гадәттән тыш хәлләр министрлыгында.
Балыкчыларны ярдан илле метр ераклыкта табып алалар. Аларны һава мендәре судносында алып чыгалар. Нәтиҗәдә, бер кеше дә зыян күрмәгән. 
