Татарстанның 8 спортчысы кышкы Олимпия уеннарында катнашуга кандидат
Быел кышкы Уеннар Көньяк Кореянең Пхенчхан шәһәрендә узачак.
(Казан, 17 гыйнвар, "Татар-информ", Гөлнар Гарифуллина). Татарстанның 8 спортчысы быел кышкы Олимпия уеннарында катнашу өчен кандидат булып тора. Бу хакта бүген коллегия утырышында Татарстанның яшьләр эшләре һәм спорт министры Владимир Леонов хәбәр итте.
Бу минутларда министрлык узган 2017 елгы эшенә йомгак ясый.
Билгеле булганча, быел кышкы Олимпиада Көньяк Кореянең Пхенчхан шәһәрендә узачак. Владимир Леонов әйтүенчә, бүген Татарстанның 370гә якын атлеты олимпия спорт төрләре буенча Россия җыелма командаларына керә. Министр хәзерге вакытта Татарстаннан 8 кешенең Пхенчханда Олимпия уеннарында катнашу өчен кандидат булуын билгеләп узды.
Олимпиада 9-25 февральдә узачак.