Татарстанның 29 районында укучыларның белеме гадел бәяләнмәгән
"Муниципаль мәгариф органнарына бу мәсьәләгә җитди игътибар бирергә кирәк", - ди Рафис Борһанов.
Скопировать ссылку
(Казан, 15 август, "Татар-информ", Гөлнар Гарифуллина). Бөтенроссия тикшерү эшләре нәтиҗәләре буенча, Рособрнадзор Татарстанда укучылар белеме гадел бәяләмәгән районнарны ачыклаган. Бу - 29 муниципаль районда 53 мәктәп. Бу хакта бүген "Тәрбия - белем бирү сыйфатын күтәрү факторы" темасына республика август киңәшмәсендә ТР вице-премьеры - мәгариф һәм фән министры Рафис Борһанов хәбәр итте.
"Муниципаль мәгариф органнарына бу мәсьәләгә җитди игътибар бирү, Рособрнадзордан алынган нәтиҗәләргә җентекле анализ үткәрү һәм укытучылар белән тиешле методик эш оештыру мөһим", - диде министр.
- Бөтенроссия тикшерү эшләре - урта һәм югары сыйныф укучыларының төрле фәннәрдән белемнәрен тикшерү чаралары. Мондый тестлар беренче тапкыр 2015 елда узган. 9-11 сыйныфларда укучыларның белемнәре БДИ һәм Төп дәүләт имтиханы өчен сайланмаган предметлардан сынала.