Татарстанның 26 районында язгы кыр эшләре башланды
Республиканың 26 муниципаль районында көзге культуралар һәм күпьеллык үләннәрне тукландыралар.
(Казан, 17 апрель, «Татар-информ»). Татарстанның авыл хезмәтчәннәре язгы кыр эшләренә кереште. Республиканың 26 муниципаль районында көзге культуралар һәм күпьеллык үләннәрне тукландыралар, дип хәбәр итә ТР Авыл хуҗалыгы һәм азык-төлек министрлыгының матбугат хезмәте.
Министрлыкның оператив мәгълүматларына караганда, 2018 елның 17 апреленә көзге культуралар - 50,9 мең (планның - 10 проценты), күпьеллык үләннәр 18 мең (4 процент) гектар мәйданда тукландырылган.
Зәй районы аграрийлары көзге культураларга 12,8 мең гектар мәйданда ашлама керткән. Сарман районында әлеге эшләр – 11,6 мең (67 процент), Азнакай районында 6 мең (42 процент) гектарда башкарылган.