Татарстанлыларның 86 проценты республикадагы милләтара мөнәсәбәтләрдән канәгать
Республикада даими рәвештә социологик тикшеренүләр нигезендә милләтара һәм конфессияара мөнәсәбәтләр мониторингы дәвам итәчәк.
(Казан, 26 март, «Татар-информ», Гадел Әхмәтҗанов). Социологик тикшерү нәтиҗәләре буенча, Татарстанда яшәүчеләрнең 86 процентка якыны республикада милләтара мөнәсәбәтләрне тыныч дип саный.
«2020 елның октябрендә „Җәмәгатьчелек фикере — Татарстан“ Фонды тикшерү үткәрде. Нәтиҗәләрдән күренгәнчә, Татарстанлыларның 85,6 проценты милләтара мөнәсәбәтләр вазгыятен тыныч һәм тотрыклы дип саный», — диде ТР Президентының Эчке сәясәт мәсьәләләре департаментының милли сәясәтне гамәлгә ашыру идарәсе башлыгы Данил Мостафин Татарстанда милләт һәм конфессияара мөнәсәбәтләр мәсьәләләре буенча ведомствоара эшче төркем утырышында.
Аның сүзләренчә, дин өлкәсендә әлеге күрсәткеч 86,1 процентны тәшкил итә.
«Даими үткәрелә торган социологик тикшеренүләр нигезендә милләтара һәм конфессияара мөнәсәбәтләр мониторингы дәвам итәчәк. 2020 елда шундый тугыз тикшеренү үткәрелде, аларның дүртесе этноконфессиональ тематикага кагылышлы иде», — диде ул
Мостафин билгеләп үткәнчә, быел Татарстанда яшәүче халыкларның телләрен һәм мәдәниятләрен саклап калу, миграция процессларының йогынтысын исәпкә алып, милләт һәм конфессияара мөнәсәбәтләрне гармониягә салу, бердәм үзаңны формалаштыру актуаль бурыч булып кала.