Татарстанлыларга инвалид балалы гаиләләр өчен ташламалар турында искәрттеләр
Скопировать ссылку
Татарстан Республикасында инвалид балалар тәрбияләүче гаиләләр, стандарт социаль ярдәм чараларыннан тыш, өстәмә ташламаларга да исәп тота ала. Республикада нинди ярдәм чаралары гамәлдә – «Татар-информ» материалында.
Инвалид балаларның ата-аналары, опекуннары һәм попечительләре өчен түбәндәге төр ярдәм чаралары каралган:
- салым ташламалары. 18 яшькә кадәрге һәр инвалид балага салым тотып калу мөмкинлеге каралган. I яки II төркем инвалид булуы расланган һәм ул урта һөнәри яки югары белем бирү учреждениесендә көндезге бүлектә укыган инвалидлар өчен салым тотып калу хокукы 24 яшькә кадәр саклана. Ташлама күләме ата-аналар һәм уллыкка алучылар өчен 12 мең сум, опекуннар һәм попечительләр өчен 6 мең сум тәшкил итә.
- инвалид балалар ясле, балалар бакчалары, шулай ук шифаханә-сәламәтләндерү һәм тернәкләндерү учреждениеләренә чиратсыз урнаша ала.
- өстәмә ял көннәре. Инвалид балаларның ата-аналарының яисә законлы вәкилләренең берсе аена дүрт көн түләүле ял алырга хокуклы.
- сыгылмалы эш графигы. 18 яшькә кадәрге инвалид баланың ата-анасы, опекуны яки попечителе тулы булмаган эш вакыты режимына күчә ала.
- отпускны уңайлы вакытта алу мөмкинлеге. Законлы вәкил еллык түләүле отпускны үзе өчен уңайлы булган теләсә кайсы вакытта алырга мөмкин.
- аерым хезмәт шартлары. Инвалид бала тәрбияләүче хезмәткәрне төнге сменаларга, эш сәгатеннән тыш эшкә, командировкаларга, шулай ук ял һәм бәйрәм көннәрендә эшкә үзенең ризалыгы белән генә җәлеп итәргә рөхсәт ителә.
- чиратсыз хезмәт күрсәтү. Гаиләләр даруханәләрдә, медицина учреждениеләрендә, кибетләрдә, почта бүлекләрендә һәм башка оешмаларда беренче чиратта хезмәт алырга хокуклы.