news_header_top_970_100
news_header_bot_970_100

Татарстанлылар Казаннан хаҗ сәфәренә кузгала

Изге юлга чыгучыларны ТР мөфтие Камил хәзрәт Сәмигуллин үзе озатырга ниятли

 (Казан, 24 сентябрь, “Татар-информ”). 25 сентябрь көнне “Казан” халыкара аэропортыннан татарстанлыларның беренче төркеме Согуд Гарәбстанының Җиддә каласына туры рейс белән хаҗ сәфәренә кузгала. Аерым алганда, “ДУМ РТ хадж” программасы буенча 6 имам-җитәкче озатуында 220 кеше әлеге ерак юлга чыга, быел исә, гомумән, 1800 татарстанлы Мәккә, Мәдинәдә хаҗ гамәлләре кылып кайта. ТР Хөкүмәте ярдәме белән, хаҗга баручыларны 15 табиб та озата бара, алар үзләре белән кунакханәләрдә һәм хаҗ гамәле кылган урыннарда медицина пунктлары оештырырлык җиһазлар, медикаментлар алып китә.

Изге юлга чыгучыларны ТР мөфтие Камил хәзрәт Сәмигуллин озатырга ниятли (шул уңайдан журналистлар Казанның Тукай ур., 3 адресы буенча урнашкан үзәккә иртәнге 7гә чакырулы).

Оештыручылардан алынган белешмә буенча, 155 мең сумга төшкән хаҗ сәфәре 20-30 көн дәвам итәчәк һәм шуның 5 көнен алар Мәдинә мәчетендә гыйбадәттә үткәрәчәк.

news_right_column_1_240_400
news_right_column_2_240_400
news_bot_970_100