Җәмгыять 29 июль 2020 14:31

Татарстанга WorldSkills чемпионаты этапларында катнашу өчен студентлар килә

Россиянең башка төбәкләрендәге WorldSkills чемпионатында катнашучылар җиһазлар җитмәү аркасында Татарстандагы мәйданчыкларда ярышырга тели.

Скопировать ссылку

(Казан, 29 июль, «Татар-информ», Әдилә Зыятдинова). Россиянең башка төбәкләрендәге WorldSkills чемпионатында катнашучылар җиһазлар җитмәү аркасында VIII «Яшь профессионаллар» Илкүләм чемпионаты финалының сайлап алу ярышларын Татарстанда үткәрәчәк. ТР мәгариф һәм фән министрының беренче урынбасары Андрей Поминов «Татар-информ» агентлыгында узган матбугат конференциясендә шул хакта хәбәр итте.

«Ярышлар мәйданчыгына WorldSkills Russia берлеге тәкъдим иткән җиһазлар урнаштырылырга тиеш, биредә бернинди чигенүләр дә була алмый. Барлык төбәкләрнең дә мондый мөмкинлекләре юк. Безгә күршеләрдән мөрәҗәгатьләр күп килә, алар үз катнашучылары өчен безнең инфраструктурадан файдалануны сорый, без аларның гозерен үтибез», - дип ачыклык кертте спикер.

Поминов сүзләренчә, Татарстанга Марий Эл, Башкортстан һәм Дагыстан республикаларыннан заявкалар килгән инде. Барлык катнашучылар да мәҗбүри рәвештә Covid-19 коронавирусына тест узачак.

Конкурсантлар компетенцияләр үзәгендә ярышачак. Биредә алар өчен камералары булган махсус мәйданчык җиһазландырылган.

#Worldskills #Татарстан

Сәхифәләр

Татарстанга WorldSkills чемпионаты этапларында катнашу өчен студентлар килә