Татарстанга «Ростех» дәүләт корпорациясе башлыгы Сергей Чемезов килде
Дәүләт корпорациясе башлыгы һәм ТР Президенты «КАМАЗ» акционерларының гомуми җыелышында катнашачак.
(Казан, 29 июнь, «Татар-информ»). Бүген Татарстанга эш сәфәре белән «Ростех» дәүләт корпорациясе генераль директоры Сергей Чемезов килде. «Бигеш» аэропортында аны ТР Премьер-министры Алексей Песошин каршы алды. Бу хакта республика башлыгының матбугат хезмәте хәбәр итә.
Сергей Чемезов аэропорттан Чаллыга юл тотты. Ул анда Татарстан Президенты Рөстәм Миңнеханов белән бергә «КАМАЗ» акционерларының гомуми җыелышында катнашачак, чарада компаниянең 2017 елда башкарган эшчәнлегенә нәтиҗә ясаячаклар.
«Ростех» корпорациясе Татарстанга төбәктәге активларга алмашка «КАМАЗ»ның 6 процент акциясен тапшырырга ниятли. Хәзерге вакытта дәүләт корпорациясе «КАМАЗ» акцияләренең 49,9 процентын контрольдә тота.
Миңнеханов белән Чемезов шулай ук «Кванториум» балалар технопаркында булачак, «КАМАЗ» футбол мәктәбендә шөгыльләнүчеләр белән очрашачак һәм «КАМАЗ-Мастер» командасының спорт техникасы белән танышачак. Моннан тыш, алар автозаводның 2019 елда узачак 50 еллыгына әзерләнү һәм үткәрү буенча киңәшмәдә катнашырга ниятли.