Татарстанга Испаниядән коронавирус йоктырып кайткан кешене хастаханәгә яткырганнар
Авыруның хәле канәгатьләнерлек.
(Казан, 27 март, «Татар-информ»). Татарстанда Covid-19 коронавирус инфекциясен йоктыруның тагын бер очрагы теркәлгән. Инфекция йоктырган кеше Россиягә Испаниядән килгән. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.
«Әлеге пассажир Россиягә — Испаниядән, ә Казанга Мәскәү аша килгән. Хәзер ул хастаханәдә. Хәле канәгатьләнерлек. Югары температура күзәтелми», — диде Галимова.
Татарстанда коронавирус йоктырган кешеләрнең саны 11гә җитте.
Кулланучылар хокукын яклау һәм кеше иминлеге өлкәсендә күзәтчелек федераль хезмәте мәгълүматлары буенча, соңгы тәүлектә Россиянең 16 төбәгендә коронавирус инфекциясен йоктыруның 196 очрагы расланган, аларның 157се — Мәскәүдә. Бүгенге көндә Россиядә барлыгы 1 036 кешедә әлеге вирус ачыкланган. 45 кеше сәламәтләнеп хастаханәдән чыккан.