Татарстанда язгы кыр эшләренә 42 миллиард сум акча тотарга ниятлиләр
Татарстанда язгы кыр эшләрен сыйфатлы итеп башкару өчен быел 42,1 миллиард сум акча кирәк. Бу хакта ТР Авыл хуҗалыгы һәм азык-төлек министрлыгының матбугат хезмәте хәбәр итә.
«Аерым алганда, ашламаларга - 15,1 миллиард, орлыкларга - 3,5 миллиард, үсемлекләрне саклау чараларына - 6,1 миллиард, ягулык-майлау материалларына - 8,6 миллиард, башка чыгымнарга 8,8 миллиард сум таләп ителә», - диелә хәбәрдә.
11 апрельгә булган мәгълүматларга караганда, Татарстанда көзге культураларны һәм күпьеллык үләннәрне тукландыру 508 мең гектар мәйданда башкарылган, бу планның 60 процентын тәшкил итә.
Хуҗалыкларда язгы кыр эшләренә 11 мең трактор, 2,5 мең йөк автомобиле, 857 чәчү комплексы, 6 мең чәчкеч һәм туфрак эшкәртү агрегатлары җәлеп ителгән.