Мәдәният 16 март 2023 21:47

Татарстанда яшәүче халыклар Казан ипподромында Нәүрүз бәйрәмен билгеләп үтәчәк

Скопировать ссылку

19 мартта Казан ипподромында Нәүрүз бәйрәме (төрки һәм Иран халыкларында – Яңа ел) узачак. Татарстан халыклары Ассамблеясы милли-мәдәни автономияләре бәйрәмне әзерләү һәм оештыруда актив катнаша. Азәрбайҗаннар, әфганнар, башкортлар, казахлар, кыргызлар, дагыстанлылар, таҗиклар, төрекләр, төрекмәннәр, үзбәкләр һ.б. милләт вәкилләре бер мәйданда үз халыкларының мәдәни күптөрлелеген һәм традицияләрен тәкъдим итәчәк. Бу хакта ТР Мәдәният министрлыгының матбугат хезмәте хәбәр итә.

Төп сәхнәдә – Татарстан халыклары Ассамблеясының милли-мәдәни берләшмәләр коллективлары катнашында концерт программасы, башка мәйданчыкларда халык уеннары оештырылачак, җиңүчеләрне истәлекле бүләкләр көтә.

«Пылау фестивале»ндә тавыш бирү ярдәмендә иң яхшы рецептны һәм аш пешерүчене – әлеге Көнчыгыш ризыгын әзерләү остасын билгеләячәкләр.

Кунаклар Нәүрүзнең төп атрибутларыннан берсе – шыттырылган бодайдан пешерелгән сүмәләктән авыз итә алачак. Аны бәйрәмгә кадәр бер тәүлек дәвамында әзерлиләр.

Милли берләшмәләрнең иң яхшы вәкилләре «Нәүрүз гүзәле» матурлык һәм талант бәйгесендә үз осталыкларын һәм милли киемнәр күрсәтәчәк. Моннан тыш, «Нәүрүз батыры» да ачыкланачак.

Чараның программасы:

10:00 сәгатьтә – мәйданчыклар эшли башлый, сәүдә рәтләре ачыла;

11:00 сәгатьтә – концерт программасы, «Нәүрүз батыры» бәйгесе башлана, балалар өчен интерактив мәйданчыклар һәм кече сәхнә эшли башлый;

12:00 сәгатьтә – бәйрәмнең тантаналы ачылышы.

Бәйрәмне ТР Мәдәният министрлыгы һәм Казан шәһәре Башкарма комитеты ярдәмендә «Татарстан халыклары Ассамблеясы» төбәк иҗтимагый оешмасы һәм «Татарстан Халыклар дуслыгы йорты» дәүләт бюджет учреждениесе оештыра.

Сәхифәләр

Татарстанда яшәүче халыклар Казан ипподромында Нәүрүз бәйрәмен билгеләп үтәчәк