Татарстанда яшәүче Надежда Капитонова сайлауда тавыш биргән өчен iPhone 16 смартфоны отты

Бүген иртән сайлауларда тавыш биргән Татарстанда яшәүче Надежда Капитонова iPhone 16 смартфоны иясе булды. Бу хакта «Мин яратам сине, Татарстан!» телемарафонында бүләкләр уйнатуны алып баручы Артур Кортес игълан итте.

Бүләкләр иртәнге 7:00 сәгатьтән 9:00 сәгатькә кадәр тавыш бирүчеләр арасында уйнатылды – бу биш меңнән артык кеше. «Рандомайзер» программасы тавыш бирүдә катнашучыларның берсен – Надежда Капитонованы очраклы рәвештә сайлады. Нәкъ менә ул яңа смартфон иясе булды.

Бүген #ГаиләБеләнСайлыйбыз #ТатарстанАлга масштаблы республикакүләм фотоконкурсы* уза. Төп призлар – ике Sollers ST8 автомобиле һәм 11 смартфон. Шулай ук катнашучылар арасында көн дәвамында махсус номинацияләрдә дә призлар уйнатылачак: өч DREAME TROUVER робот-пылесосы, өч RitFort аэрогриле, өч Hyundai пар белән кием үтүкләү җайланмасы һәм Samsung микродулкынлы миче.

Төп бүләкләрне отучыларны социаль челтәрләрдә («Татарстан Алга» ВКонтакте төркеме) һәм ТНВ телеканалында бүләкләр уйнатуны турыдан-туры трансляцияләү вакытында игълан итәчәкләр, өстәмә призларга ия булучыларның исемнәре «Татарстан Алга» ВКонтакте төркемендә генә урнаштырылачак. Махсус номинацияләрдә җиңүчеләр төп фотоконкурста катнашучылар арасыннан сайлап алыначак.

Бүген, 14 сентябрьдә, Татарстанда Бердәм тавыш бирү көне уза. Республика халкы Татарстан Рәисен сайлый. Шулай ук 18нче номерлы Мәләкәс округы буенча Дәүләт Советы депутаты һәм 7,5 меңнән артык муниципаль депутат сайлана.

Татарстан Рәисен сайлауларда дүрт кандидат катнаша (алфавит тәртибендә): Рөстәм Миңнеханов («Бердәм Россия»), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») һәм Руслан Йосыпов (ЛДПР).

Муниципаль сайлауларда катнашучыларның рекордлы саны теркәлгән – 11,4 меңнән артык кандидат. Алар арасында төп партияләр вәкилләре һәм үз-үзен тәкъдим итүче буларак катнашучы 2,6 меңнән артык кеше.

Татарстанда тавыш бирү өчен 2752 участок ачылды. Участоклар 7:00 сәгатьтән 20:00 сәгатькә кадәр эшләячәк.

«ТНВ-Татарстан» һәм «ТНВ-Планета» телеканалларында 14 сәгатьлек «Мин яратам сине, Татарстан!» телемарафоны уза. Ул 22:00 сәгатькә тәмамланачак.

Эфирда сайлау участокларыннан репортажлар күрсәтелә. Студиядә экспертлар, сәясәтчеләр һәм артистлар чыгыш ясый.

• Фотоконкурс лотерея булып саналмый, шулай ук реклама булып саналмый, фотоконкурста катнашу түләүсез һәм ирекле нигездә башкарыла.