Татарстанда яңгыр, яшен һәм температура фоны күтәрелү фаразлана
Җәйнең беренче атнасында Татарстанда элек урнашкан тотрыксыз һава торышы сакланачак, әмма атнаның икенче яртысында республикада бераз җылытып җибәрәчәк. Бу хакта ТР Гидрометеорология үзәге тараткан фараздан билгеле булды.
Иртәгә, 2 июньдә, республика атмосфера фронты йогынтысында булачак. Аязучан болытлы һава торышы көтелә. Кыска вакытлы, ә көндез кайбер районнарда көчле яңгырлар яву фаразлана. Төнлә һәм иртән урыны белән томан төшәчәк. Көндез Татарстанның аерым районнарында яшенле яңгыр һәм секундына 15-18 метр тизлектәге көчле җил көтелә. Кайбер урыннарда боз яварга да мөмкин.
Шул ук вакытта июньнең икенче көнендә һава температурасы төнлә +6..+11 градус, ә көндез +16..+21 градус булачак, дип хәбәр итте синоптиклар.
Чәршәмбе, 3 июньдә, төбәктә кыска вакытлы яңгырлар дәвам итәчәк, әмма көндез алар күбесенчә республиканың көнчыгыш өлешендә булачак, дип көтелә. Кайбер районнарда яшен булырга мөмкин. Төнлә бераз салкынрак — +5..+10 градус, ә көндез бераз җылырак — +17..+22 градус булачак.
Пәнҗешәмбе, 4 июньдә, Татарстанда янәдән кыска вакытлы яңгыр яву көтелә, әмма бу юлы бары тик аерым урыннарда гына. Температура фоны күтәреләчәк: төнлә термометр баганалары +7..+12 градуска кадәр төшәчәк, көндез һава +19..+24 градуска кадәр җылыначак.
Метеорологлар мәгълүматларына караганда, җомга һәм шимбә, 5 һәм 6 июньдә, республикада һава торышы тотрыксыз булып калачак. Кыска вакытлы яңгыр һәм яшен булырга мөмкин. Һава температурасы исә сизелерлек үзгәрмәячәк: төнлә +8..+13 градус, ә көндез +19..+24 градус җылы булачак, дип көтелә.