Татарстанда яңгыр һәм көчле җил көтелә
Көндез республика территориясендә һава температурасы +18 градустан югары күтәрелми.
(Казан, 1 август, «Татар-информ»). Иртәгә, 2 августта, Татарстанда аязучан болытлы һава торышы саклана. Төнлә күпчелек районнарда, ә көндез урыны белән яңгыр явачак. Бу хакта Татарстан Гидрометеорология һәм әйләнә-тирә мохитне күзәтү идарәсе хәбәр итә.
Моннан тыш, республика территориясендә төнлә һәм көндез «урыны белән төньяк-көнбатыштан исүче җилнең тизлеге секундына 16-21 метрга кадәр җитәргә мөмкин», дип кисәтә синоптиклар.
Кичен һәм төнлә термометр баганалары нульдән 6 градуска кадәр төшәчәк, көндез һава 13-18 градуска кадәр җылыначак.
«Температура җитәрлек дәрәҗәдә югары түгел. Аномалия дүрт-биш, бәлки, җиде градус тәшкил итәргә мөмкин», – дигән иде К(И)ФУ профессоры Юрий Переведенцев.