Татарстанда яңа уку елыннан "Мәктәпкә волейбол!" проекты гамәлгә ашырылачак
"Татарстанда мәктәп спорты чыннан да киңкүләмгә әверелде", - диде мәгариф министры Рафис Борһанов.
(Казан, 15 август, "Татар-информ", Гөлнар Гарифуллина). Татарстанда яңа уку елында "Мәктәпкә волейбол!" проекты гамәлгә ашырыла башлый. Бу хакта "Казан Экспо" үзәгендә республика август киңәшмәсе пленар утырышында ТР вице-премьеры - мәгариф һәм фән министры Рафис Борһанов әйтте.
"Татарстанда мәктәп спорты чыннан да киңкүләмгә әверелде. Министрлык тарафыннан мәктәпләрдә спортның уен төрләрен үстерүгә басым ясала. Бу уку елыннан Татарстанның Волейбол федерациясе инициативасы буенча "Мәктәпкә волейбол!" проекты гамәлгә ашырыла башлый. Фәрит Хәйруллович, (Дәүләт Советы Рәисе- Т.И.) бу процесста оештыру эше өчен рәхмәт!" - дип мөрәҗәгать итте министр.
Рафис Борһанов әйтүенчә, республиканың мәгариф өлкәсендә физкультура-спорт юнәлешендә 2,5 меңнән артык секция эшли, аларга 70 меңгә якын укучы йөри. Республикадагы база аларның санын тагы да арттыру мөмкинлеген бирә, дип саный министр.