Татарстанда урман каракларын ачыклый торган сервис кулланышка кертелгән
Сервис кичәге һәм бүгенге фотоларны чагыштырып, анализ ясарга мөмкинлек бирә.
(Казан, 4 сентябрь, «Татар-информ», Гөлнар Гарифуллина). Татарстанда урман каракларын ачыклый торган сервис кулланышка кертелгән. Урманчы инспекторлар цифрлаштыру ярдәмендә урманнардагы үзгәрешләрне ачыклаучы системадан файдалана.
Татарстан урман хуҗалыгы министрының беренче урынбасары Илгизәр Зарипов Кукмарада журналистларга, сервис кичәге һәм бүгенге фотоларны чагыштырып, анализ ясарга мөмкинлек бирә, дип әйтте. Урман кисүләр ачыкланса, инспекторлар кисү законлымы-юкмы икәнен ачыклый.
«Процесс автоматлаштырылган, ясалма интеллект системасы кертелгән, ул федераль урман фонды җирләрендәге үзгәрешләрне күрсәтә. "Урман үзгәрү сервисы"н файдаланып, урманчылар реаль вакыт режимында законсыз урман кисүләрне һәм карьерларны ачыклый», — дип сөйләде Илгизәр Зарипов.
Бу продуктны Урман хуҗалыгы министрлыгы Цифрлаштыру министрлыгы һәм Иннополис вәкилләре белән берлектә кулланышка керткән.
Илгизәр Зарипов әйтүенчә, система корыган агачларны да, урман эчендәге законсыз корылмаларны да күрсәтә. «Законсыз карьерларны да ачыклап була. Бездә урманнар 100 процент дәрәҗәдә космик мониторинг белән колачланган. Бу сервис аша без урман янгыннары килеп чыгу нокталарында күрә алабыз, бу термик нокталар», — диде.