Татарстанда унике халык һөнәрчелеге вәкиле биш млн сум грант алачак
Узган ел халык сәнгать һөнәрләре өлкәсендә 17 кече һәм урта бизнес оешмасы ярдәм алды.
(Казан, 23 июль, «Татар-информ», Марат Ишкилдин). Быел Татарстанда традицион сәнгать һөнәрләре өлкәсендә эшләүче 12 кече һәм урта бизнес вәкиле 5 миллион сумлык ярдәм алачак. Бу хакта «Татар-информ» корреспондентына ТР мәдәният министры урынбасары Дамир Натфуллин хәбәр итте.
Татарстан Республикасы Мәдәният министрлыгы Халык сәнгать һөнәрләре өлкәсендә кече һәм урта бизнес вәкилләре өчен өч баскычлы чара эшләде, ул аларга 500, 400 һәм 300 мең сум күләмендә грантлар алырга мөмкинлек бирә.
«Быел грантларны 12 эшмәкәр алачак. 500 мең сум күләмендә биш грант, дүртесе - 400 мең сум һәм 300 мең сум күләмендә өч грант каралган», - диде Натфуллин.
Элегрәк грант 300 мең сум тәшкил иткән иде. 2019 елда 4 млн 960 мең сумлык җиһазлар сатып алуга 17 оешма акча алган.
Әлеге ярдәм чарасы 2015 елдан бирле гамәлдә. Ел саен 10нан 12гә кадәр грант алучы эшмәкәр җиһазлар сатып алуга ярдәм ала. Грантларның гомуми суммасы 3 миллион сум белән чикләнгән иде.
«Халык һөнәрчелеге өчен җиһазлар кыйммәт булу сәбәпле, 2019 елда ТР Президенты грантларның гомуми суммасын 5 млн сумга кадәр арттыру турында карар кабул итте», - диде министр урынбасары.
Гаризалар 20 июльдән 20 августка кадәр кабул ителә. Ярдәмне халык сәнгать һөнәрләре өлкәсендә эшләүче кече һәм урта эшмәкәрлек субъектлары ала ала. Гаризага теркәргә кирәк булган документлар исемлеге министрлыкның рәсми сайтында урнаштырылган.